Innealtóir Sinsearach Feidhmiúcháin – Comhairle Contae Loch Garman

Achoimre ar an bpost

Beidh an ceapaí/na ceapaithe freagrach as na baill foirne agus as clár oibre na stiúrthóireachtaí/na rannóga agus na feidhme a bheidh leagtha orthu a bhainistiú go héifeachtach. Oibríonn bainisteoirí ag an leibhéal seo laistigh de theorainneacha a bhaineann leis an bpost de réir fhís agus spriocanna an Údaráis Áitiúil, de réir mar a leagtar amach ina Phlean Corparáideach, agus feidhmíonn an ról i stiúrthóireachtaí éagsúla. Tá sé fíorthábhachtach seirbhísí a sholáthar go héifeachtach agus luach ar airgead a bhaint amach.

Beidh an tInnealtóir Sinsearach Feidhmiúcháin i gceannas ar fhoireann nó ar fhoirne agus tabharfaidh siad tacaíocht theicniúil agus bhainistíochta i ngach réimse seirbhíse an údaráis áitiúil agus beidh orthu a bheith i dteagmháil le gníomhaireachtaí seachtracha agus cabhrú leis an bpróiseas daonlathach.

Beidh ar an Innealtóir Sinsearach Feidhmiúcháin a bheith ag obair go dlúth leis an bhFoireann Bhainistíochta Shinsearach agus le Baill Thofa, leis an réimse iomlán seirbhísí a chur ar fáil, le cinntí beartais áitiúla a chur i bhfeidhm agus le spriocanna straitéiseacha corparáideacha a bhaint amach, de réir threoir bheartais ghinearálta na Comhairle tofa ag leibhéal na Comhairle agus ag leibhéal an Cheantair Bhardasaigh. Is féidir go mbeidh orthu ionadaíocht a dhéanamh don Innealtóir Sinsearach chomh maith.

Tá liosta iomlán de riachtanais an phoist ar fáil sa Leabhrán Eolais.

.

Cur síos poist

Treoir a thabhairt agus bainistíocht a dhéanamh ar chur i bhfeidhm na gclár agus na dtionscadal cuí i ngach réimse seirbhíse. Oibriú go héifeachtach le comhghleacaithe le seirbhísí a chur ar fáil, mar bhall d’fhoireann ildisciplíneach, ag comhoibriú agus ag dul i dteagmháil le foirne eile san eagraíocht chun na spriocanna corparáideacha a bhaint amach.

Maoirseacht a dhéanamh agus riarachán conartha a dhéanamh ar oibreacha tógála, oibríochtaí agus cothabhála.

Comhoibriú agus teagmháil a dhéanamh, trí obair thras-disciplíneach, le soláthar ar son ár bpobail, a bheith nuálach i dtaca le todhchaí an rialtais áitiúil agus forbairt a dhéanamh ar na daoine san eagraíocht.

Spriocanna, cuspóirí, tuairisciú agus príomhtháscairí feidhmíochta a leagan amach chun cúnamh a thabhairt i dtaca le pleananna corparáideacha, straitéisí agus pleananna seirbhíse bliantúla a fhorbairt.

Tá liosta iomlán na bpríomhdhualgas ar fáil sa Leabhrán Eolais.

Eolas faoin eagraíocht

Contae i gCúige Laighean is ea Contae Loch Garman ina bhfuil daonra de 163,527 duine (Daonáireamh 2022). Léiríonn sin méadú de 13,805 nó 9.2% ón daonáireamh deireanach in 2016.

Tá Loch Garman suite in oirdheisceart na hÉireann agus teorainn ag an gcontae le ceithre chontae eile agus tá achar 2,367 km2 ann; is é Loch Garman an 13ú contae is mó in Éirinn, agus an 9ú contae is mó ó thaobh daonra de. Tá imeallbhord fada i Loch Garman agus, de thairbhe infheistíocht a rinneadh le déanaí sa dámhótarbhealach, tá teacht maith ag an gcontae ar Bhaile Átha Cliath agus ar Phort Láirge; is féidir taisteal chucu laistigh de 90 nóiméad agus 45 nóiméad faoi seach.

Tá Buiséad Ioncaim measta de €175m ag Comhairle Contae Loch Garman don bhliain 2026 agus tá €150m i gceist don chlár Infheistíochta Caipitil.  

Tá Comhairle Contae Loch Garman ar cheann de na fostóirí is mó sa chontae agus tá thart ar 900 ball foirne i gceist, agus 450 ball foirne atá ar scor. 

Cuireann Comhairle Contae Loch Garman réimse leathan agus cuimsitheach seirbhísí, a bhíonn á bhforbairt i gcónaí, ar fáil do shaoránaigh, ghnólachtaí agus chuairteoirí sa Chontae. 

Tá folúntas anois i gComhairle Contae Loch Garman d’Innealtóir Sinsearach Feidhmiúcháin.

Sochair

Scála Tuarastail i bhfeidhm ón 1 Feabhra 2026:

€79,881 – €82,330 – €83,503 – €85,968 – €88,454 – €90,933 – €93,430 – €96,567LSI1 – €99,695LSI2 

Beidh na huaireanta freastail de réir mar a shocraítear iad ó am go ham agus ní bheidh siad níos lú ná 35 huaire an chloig san iomlán in aghaidh na seachtaine. 

Ceadaítear 30 lá mar shaoire sa bhliain sa phost mar Innealtóir Sinsearach Feidhmiúcháin.

Sonraí an Phróisis Roghnúcháin

Is féidir go gcuirfear seisiún rangaithe nó gearrliostaithe ar siúl, bunaithe ar an eolas a thugtar ar an bhfoirm iarratais. Beidh na critéir rangaithe nó ghearrliostaithe bunaithe ar riachtanais an phoist de réir mar a leagtar amach sna rannáin ‘critéir cháilitheachta agus scileanna’, ‘inniúlachtaí’ agus/nó ‘eolas’ i sonraí an phoist. Dá bharr seo, tá sé tábhachtach go ndéanann tú machnamh ar an taithí atá agat, bunaithe ar na riachtanais sin.

Mura gcuireann tú eolas ar fáil faoi na riachtanais seo, is féidir nach bhfaighidh tú cuireadh chuig an gcéad chéim eile den phróiseas roghnaithe.

Is fostóirí comhdheiseanna iad na húdaráis áitiúla.