Leas-Phríomhchoimisinéir Pleanála, An Coimisiún Pleanála

Achoimre ar an bpost

Is ceapachán feidhmiúcháin lánaimseartha ar feadh téarma oifige cúig bliana é post an Leas-Phríomhchoimisinéara Pleanála. Tuairisceoidh an duine a cheapfar mar Leas-Phríomhchoimisinéir Pleanála go díreach don Phríomh-Choimisinéir Pleanála. Beidh an Leas-Phríomhchoimisinéir Pleanála freagrach as gnáthfheidhmíocht laethúil na gCoimisinéirí Pleanála a fhormhaoirsiú agus a threorú chun a chinntiú go soláthróidh siad cinntí láidre tráthúla ardchaighdeáin atá fónta ó thaobh an dlí de ar an gcásobair ar fad, i.e., achomhairc phleanála, iarratais dhíreacha agus cineálacha eile cásanna i gcomhréir le pleanáil chuí agus forbairt inchothaithe an limistéir atá i gceist.   

Cur síos poist

Gníomhóidh an Leas-Phríomhchoimisinéir Pleanála i gcomhar leis an bPríomh-Choimisinéir Pleanála agus leis na Coimisinéirí Pleanála chun na nithe seo a leanas a dhéanamh:

• cinneadh a dhéanamh ar chásanna atá os comhair an Choimisiúin Pleanála, a ghníomhaíonn mar eadránaí deiridh i leith achomhairc phleanála, mórthionscadail bhonneagair, atreoruithe, forbairtí údaráis áitiúil agus cásanna eile ar bhealach neamhchlaon, éifeachtúil, cothrom agus oscailte.
• rannchuidiú lena chinntiú go ndéanann an Coimisiún Pleanála a sciar féin mar chomhlacht neamhspleách maidir lena chinntiú go n-urramaíonn forbairtí fisiciúla agus mórthionscadail bhonneagair in Éirinn na prionsabail um pleanáil chuí agus forbairt inchothaithe.

Maidir leis an iarrthóir is fearr:

• beidh sé nó sí in ann ardleibhéil ionracais ghairmiúil agus phearsanta a léiriú, agus éiteas forásach earnála poiblí mar spreagadh aige nó aici;
• beidh teist chruthaithe gnóthachtála air nó uirthi ar leibhéal sinsearach san earnáil phríobháideach nó phoiblí, a léiríonn go sealbhaíonn sé nó sí an fhís agus na scileanna ceannaireachta agus bainistíochta is gá, mar aon le hathléimneacht phearsanta;
• beidh sé nó sí in ann smaoineamh agus gníomhú go straitéiseach;
• beidh sárscileanna idirphearsanta agus cumarsáide aige nó aici;
• beidh cumas cruthaithe aige nó aici feidhmiú go héifeachtach faoi bhrú agus laistigh de spriocdhátaí;

Critéir Bhunriachtanacha:

Beifear ag súil leis go léireoidh iarratasóirí go bhfuil acu an mórchumas ceannaireachta, an taithí agus na luachanna láidre earnála poiblí is gá chun ról an Leas-Phríomhchoimisinéara Pleanála a chomhlíonadh. Beifear ag súil leis freisin go mbeidh dea-eolas agus dea-thuiscint acu ar na prionsabail um dhea-phleanáil agus um fhorbairt inchothaithe, ar chosaint an chomhshaoil agus ar an gcomhthéacs náisiúnta agus Eorpach beartais pleanála agus ar an gcreat reachtach náisiúnta agus Eorpach ar laistigh díobh a oibríonn an Coimisiún Pleanála.

I gcomhréir le halt 506 den Acht um Pleanáil agus Forbairt, 2024, ba cheart don iarrthóir is fearr don phost taithí shásúil, nó meascán sásúil de thaithí agus d’eolas, a bheith aige nó aici ar cheann amháin nó níos mó de na nithe seo a leanas:

• soláthar bonneagair;
• tithíocht;
• pleanáil fhisiciúil;
• forbairt inchothaithe;
• ailtireacht;
• oidhreacht;
• gnóthaí pobail;
• gnóthaí sóisialta;
• pleanáil;
• an comhshaol;
• an mhuir;
• an t-athrú aeráide;
• an dlí agus rialachas corparáideach.

 Is féidir mionsonraí iomlána a fháil sa leabhrán faisnéise

Eolas faoin eagraíocht

Imríonn an Coimisiún Pleanála ról ríthábhachtach i gcóras pleanála na hÉireann, agus tá ról garbhreithiúnach aige maidir le cinneadh a dhéanamh ar achomhairc in aghaidh cinntí pleanála ó údaráis áitiúla, ar iarratais dhíreacha ar bhonneagar straitéiseach agus ar chatagóirí eile forbartha. Is é an sainordú atá aige cinntí pleanála láidre a sholáthar i gcomhréir le pleanáil chuí agus forbairt inchothaithe an limistéir laistigh d’amlínte sonraithe/éigeantacha, agus aird á tabhairt an tráth céanna ar phrionsabail na trédhearcachta, na neamhchlaontachta agus an neamhspleáchais. 

Sonraí an Phróisis Roghnúcháin

Is é an dáta deiridh ar a nglacfar le hiarratais chomhlánaithe ná 3 p.m. Déardaoin an 19 Feabhra 2026.

Má cheapann tú go mbainfeá tairbhe as plé rúnda faoin deis seo, déan teagmháil le Eimear O’Connor trí ríomhphost a sheoladh chuig eimear.oconnor@publicjobs.ie.

Táimid tiomanta do bheartas comhdheise a leanúint, agus spreagaimid iarratais faoi gach ceann de na naoi bhforas den Acht um Chomhionannas Fostaíochta.